Германија со радикални пензиски промени: Работен век до 70 години и укинување на мини работните места
Македонските државјани кои работат во Германија, заедно со милиони други работници во оваа земја, ќе се соочат со драстични промени доколку германската влада ги усвои предлозите на Пензиската комисија. Пакетот од 30 мерки носи укинување на две клучни привилегии, мини работните места и можноста за предвремено пензионирање на 63 години.
Работен век се продолжува до 70 години
Една од најконтроверзните мерки е постепеното поместување на границата за задолжително пензионирање. Според новиот план, таа најпрво ќе биде подигната на 69 години, а на крајот работниците ќе мора да работат до 70-годишна возраст. Ова значи дека сегашните вработени ќе работат значително подолго од претходните генерации.
Крај на мини работните места со посебен статус
Мини работните места, кои овозможуваат заработка до 603 евра месечно со минимални бенефиции, ќе го изгубат својот посебен статус. Повеќето работници што ги извршуваат овие работи ќе мора да почнат да плаќаат придонеси за социјално и пензиско осигурување. Исклучок ќе останат само студентите, доколку нивната плата не ја надминува сумата од 603 евра.
Најпогодени: Угостителство, трговија и жените со скратено работно време
Промените најмногу ќе влијаат врз работниците во трговијата, угостителството, приватните домаќинства и голем број жени кои работат со скратено работно време. Многу од нив во моментов заработуваат дополнителен приход без значителни одбитоци, а реформата би им го намалила месечниот приход. Застапниците на реформата, пак, тврдат дека работниците на долг рок би имале корист бидејќи би стекнале поголеми индивидуални пензиски права.
Пензискиот фонд се полни, но со ризик од сива економија
Германските медиуми предупредуваат дека реформата би можела да има несакани последици. Постои страв дека дел од работните места би завршиле во сивата економија, односно непријавена работа, особено во сектори како угостителството и домашните работи. Мини работата во моментов ја користат повеќе од 5 милиони луѓе во Германија.
Пензиите на берза и враќање на факторот одржливост
Дел од пензиските средства ќе бидат преместени на берзата како финансиски амортизер, првично еден процентен поен, а подоцна и два. Од 2031 година се враќа и „факторот на одржливост“ кој директно ја поврзува стапката на раст на пензиите со бројот на луѓе што уплаќаат придонеси.
Засега, предлогот е само препорака на комисијата. Германските власти ќе одлучуваат за евентуалното воведување на новите правила во наредниот период, а предлозите треба да стигнат до канцеларот Фридрих Мерц и министерката за труд Бербел Бас.
