Кој е Борче Серафимовски предложенот министер од ЗНАМ? Контроверзи и биографија

Кој е Борче Серафимовски? Биографија, бизнис и прашања што ја следат новата министерска номинација

Предлогот на ЗНАМ за нов министер отвори повеќе дилеми – од образованието и деловните активности, до прашањето за евентуално бугарско државјанство, на кое засега нема јавно даден одговор.

Предлогот Борче Серафимовски да стане министер во новата Влада предводена од Христијан Мицкоски повторно го врати во фокус неговото професионално и политичко минато. Иако од владејачкото мнозинство тој се претставува како кадар што треба да донесе нова енергија во ресорот, дел од неговата јавна биографија веќе со години предизвикува полемики.

Образование во Бугарија и прашањето што со години останува без одговор

Една од најконтроверзните точки во јавната биографија на Борче Серафимовски е фактот што целото свое високо образование го стекнал во Република Бугарија.

Самото студирање во странство не претставува ништо спорно. Меѓутоа, во јавноста со години се поставува прашањето под кои услови било финансирано неговото образование.

Општо е познато дека бугарските државни универзитети прават разлика меѓу домашните и странските студенти, при што странските државјани вообичаено плаќаат значително повисоки школарини од бугарските државјани. Токму поради тоа, со години постојат јавни шпекулации дека Серафимовски можеби поседува бугарско државјанство, што би му овозможило да студира под поповолни услови.

Досега, Серафимовски јавно не се произнел дали поседува или не поседува бугарски пасош или бугарско државјанство. Ниту Владата, при неговото предлагање за министер, соопшти дали ова прашање било предмет на проверка.

Токму затоа МК Информер денес директно го постави ова прашање до премиерот Христијан Мицкоски:

„Дали знаете дали Борче Серафимовски има бугарски пасош, со оглед на тоа што целото негово високо образование е стекнато во Бугарија?“

Премиерот одговори:

„Не сум го прашал дали има двојно, тројно или било кое друго државјанство. Мене ме интересираше дека има план има визија за земјоделците.“

Со овој одговор прашањето не доби потврда, но ниту беше демантирано. Затоа дилемите што со години се присутни во јавноста остануваат отворени, а наједноставен начин тие да бидат затворени е самиот Серафимовски јавно и недвосмислено да се произнесе дали поседува бугарско државјанство или не.

Прашањето за бугарски пасош останува без јавен одговор

Темата за евентуално бугарско државјанство не е само лична работа на еден функционер. Таа станува прашање од јавен интерес кога лицето треба да биде министер во држава во која односите со Бугарија и прашањата поврзани со националниот идентитет со години се меѓу најчувствителните политички теми.

Токму затоа, јавноста очекува идните носители на највисоките државни функции да бидат целосно транспарентни кога станува збор за вакви прашања, особено кога тие веќе подолго време се предмет на јавни дебати.

Бизнис во енергетиката додека извршува државна функција

Покрај политичката кариера, внимание привлекуваат и деловните активности на предложениот министер.

Борче Серафимовски е сопственик на компанијата за производство на електрична енергија од обновливи извори „Тринити Енерџи ДООЕЛ“, основана во март 2024 година, непосредно пред парламентарните избори.

Во меѓувреме, Серафимовски стана државен секретар во Министерството за земјоделство, а на седницата на Регулаторната комисија за енергетика од 30 декември 2025 година, неговата компанија доби лиценца за пробна работа на фотоволтаична електрана во атарот на Свети Николе со инсталиран капацитет од околу 3,5 мегавати (според моќноста на фотонапонските панели).

Според јавно достапните податоци, управител на компанијата е Сања Маневска Серафимовска.

Финансиските извештаи покажуваат дека „Тринити Енерџи ДООЕЛ“ во 2025 година остварила приходи од околу 1,1 милион денари, прикажала добивка од 1.000 денари, а според податоците на платформата „Company Wall“ компанијата нема евидентирани вработени.

Сами по себе, овие податоци не претставуваат доказ за незаконско постапување. Сепак, временската динамика – формирање на компанијата непосредно пред изборите, добивање лиценца во период кога сопственикот веќе извршува висока државна функција и неговата последователна номинација за министер – отвора прашања што јавноста има право да ги постави.

Особено затоа што во демократските општества од носителите на јавни функции не се очекува само да постапуваат законски, туку и да избегнуваат ситуации што можат да создадат перцепција за можен судир на интереси или за привилегирана положба. Токму затоа транспарентноста и јасните одговори се единствениот начин да се отстранат сите дилеми околу ваквите случаи.

Политичка, но и јавна одговорност

Одговорот на премиерот отвори нови прашања околу критериумите што Владата ги применува при изборот на министрите.

Во услови кога темите поврзани со националниот идентитет и односите со Бугарија остануваат едни од најчувствителните политички прашања во Македонија, дел од јавноста смета дека функционерите треба транспарентно да одговорат на ваквите дилеми.

Во исто време, правниот принцип е јасен – никој не смее да биде обвинет без докази, ниту да се извлекуваат заклучоци само врз основа на шпекулации. Но јавниот интерес подразбира дека прашањата што се однесуваат на интегритетот на идните министри треба да добијат јасни и проверливи одговори.

Со влегувањето во Владата, Борче Серафимовски ќе биде изложен на засилен јавен надзор. Освен резултатите што ќе ги постигне како министер, јавноста ќе очекува и транспарентни одговори за темите што веќе подолго време се поврзуваат со неговото име.

Прашањата што ги отвори МК Информер денес не се насочени против личност, туку против молкот. Во демократско општество, носителите на највисоките јавни функции не ја градат довербата со премолчување, туку со целосна транспарентност. Доколку Борче Серафимовски нема бугарско државјанство и не постои никаков судир на интереси поврзан со неговите деловни активности, тогаш токму тој има најголем интерес овие дилеми јавно да ги расчисти еднаш засекогаш.