МВР дел од меѓународна операција против онлајн измами и перење пари
Во акцијата на Интерпол учествувале 97 држави и територии
Министерството за внатрешни работи, преку Секторот за компјутерски криминал во координација со Секторот за меѓународна полициска соработка, учествувало во меѓународната операција FIRSTLIGHT 2026, насочена кон сузбивање на онлајн измами и перење пари.
Од МВР информираат дека операцијата, координирана од Интерпол, се реализирала во периодот од 15 јануари до 30 април 2026 година, со учество на надлежни институции од 97 држави и територии.
Цел биле измамите преку социјален инженеринг
Операцијата била насочена кон откривање и спречување на измами кои се извршуваат со методот на социјален инженеринг, при што сторителите ја злоупотребуваат довербата на граѓаните и компаниите за да стекнат пари или чувствителни информации.
Во оваа категорија спаѓаат:
измами преку компромитирана службена електронска пошта (Business E-mail Compromise),
инвестициски измами,
романтични измами,
лажно претставување,
сексуална уцена (sextortion),
други форми на интернет измами.
Над 5.800 уапсени и блокирани милиони долари
Според податоците од Интерпол, операцијата дала значајни резултати на глобално ниво.
Меѓу нив се:
5.811 уапсени лица,
повеќе од 142.000 идентификувани жртви,
152.808 анализирани случаи,
23.715 решени случаи,
15.606 идентификувани осомничени,
31.014 блокирани банкарски сметки,
речиси 293 милиони американски долари пресретнати незаконски стекнати средства,
99 известувања и дифузии преку Интерпол.
Во рамките на операцијата биле спроведени и претреси, размена на разузнавачки информации, замрзнување банкарски сметки и виртуелни паричници, како и активности за брзо запирање на незаконски финансиски трансакции.
МВР: Продолжува соработката со Интерпол
Од Министерството за внатрешни работи оценуваат дека учеството во операцијата ја потврдува важноста на меѓународната полициска соработка во борбата против киберкриминалот, финансискиот криминал и транснационалните криминални групи.
Воедно најавуваат дека ќе продолжат активно да соработуваат со Интерпол и со меѓународните партнери во откривањето и спречувањето на онлајн измамите и заштитата на граѓаните од сè пософистицираните облици на дигитален криминал.
