Во Германија електричен автомобил за само 49 евра месечно
11/07/2026 11:15
Во Германија електричен автомобил за помалку од 50 евра месечно
Кинескиот „Leapmotor T03“ се нуди по цена што привлекува внимание
Во Германија е достапна лизинг-понуда за електричниот градски автомобил Leapmotor T03, чија месечна рата изнесува само 48,90 евра. Со ова, користењето на автомобилот во одредени случаи може да биде поевтино од месечна претплата за мобилен телефон.
Моделот го нуди кинескиот производител Leapmotor, кој на европскиот пазар настапува во партнерство со автомобилската група Stellantis.
Ниската рата не значи и сопственост
Понудата важи за договор на лизинг во траење од 36 месеци, со ограничување до 10.000 километри годишно.
Во текот на тригодишниот договор, корисникот ќе плати околу 1.760 евра преку месечните рати. По истекот на договорот, возилото не преминува автоматски во негова сопственост.
Клиентот може да го врати автомобилот или да го откупи за дополнителни 11.139 евра.
Државните субвенции ја намалуваат цената
Редовната продажна цена на Leapmotor T03 е околу 18.900 евра, но ниската месечна рата е овозможена благодарение на новата германска програма за поддршка на електричните возила.
Германија обезбеди три милијарди евра за субвенционирање на купување и лизинг на нови електрични и делумно електрифицирани автомобили. Програмата треба да опфати околу 800.000 возила до 2029 година.
Основната државна помош изнесува 3.000 евра, а за семејства со пониски приходи и најмалку две деца може да достигне и до 6.000 евра.
Не е достапна за секого
Ратата од 48,90 евра не е универзална понуда. Нејзината висина зависи од тоа дали купувачот ги исполнува условите за државна субвенција, неговата кредитна способност и условите на конкретниот лизинг-договор.
Дополнително, во месечната рата не се вклучени осигурувањето, регистрацијата, полнењето на батеријата, гумите, сервисирањето и евентуалните трошоци доколку се надмине дозволената километража.
Конкуренцијата ги намалува цените
И покрај дополнителните трошоци, понудата покажува колку државните субвенции и засилената конкуренција влијаат врз цените на електричните автомобили во Европа.
Со месечна рата од околу 49 евра, Leapmotor T03 е речиси двојно поевтин од некои европски модели од истата класа, како Fiat 500e, чиј лизинг на германскиот пазар започнува од околу 99 евра месечно.
Во првите четири месеци од 2026 година, на германскиот пазар биле испорачани 4.523 возила од марката Leapmotor, што претставува раст од 358 проценти во споредба со истиот период лани.
