Денеска делумно затемнување на Сонцето над Македонија: Еве кога и од каде најдобро ќе се гледа

Денеска, 12 август, жителите на Македонија ќе имаат можност да набљудуваат делумно затемнување на Сонцето.

Кај нас ефектот ќе биде краток и значително послаб од оној во делови од Европа.

Сепак, непосредно пред зајдисонце ќе може да се забележи како Месечината „зема“ мал дел од сончевиот диск.

Во Европа ќе има целосно затемнување

Настанот е дел од многу поголем астрономски спектакл.

Целосното затемнување ќе биде видливо по тесна патека која минува преку Гренланд, Исланд и делови од Шпанија.

Делови од Европа накратко ќе потонат во мрак.

Македонија се наоѓа на источниот раб на зоната на видливост.

Поради тоа, кај нас ќе има само делумно затемнување на Сонцето.

Во Скопје почнува околу 19:29 часот

Во Скопје затемнувањето треба да започне околу 19:29 часот.

Максимумот се очекува околу 19:36 часот.

Настанот ќе се одвива непосредно пред зајдисонце.

Во максимумот, Месечината ќе покрие приближно 12 проценти од пречникот на Сонцето.

Тоа одговара на околу пет проценти од неговата видлива површина.

Наместо силно затемнување, ќе изгледа како мал „залак“ на работ од Сонцето.

Во Битола ефектот ќе биде послаб

Според анализата на универзитетскиот професор Дејан Трајковски, во Битола затемнувањето започнува околу 19:31 часот.

Максимумот таму се очекува околу 19:34 часот.

Месечината би покрила околу 6,36 проценти од дијаметарот на сончевиот диск.

Тоа е околу 1,91 процент од неговата површина.

Дополнителен проблем ќе биде ниската положба на Сонцето.

Од делови на Битола тоа може да исчезне зад Пелистер уште пред максимумот.

Каде најдобро да се набљудува

Најважно е да се избере место со целосно отворен поглед кон запад и северозапад.

Добар избор се височинки, отворени тераси и места без згради, дрвја или ридови пред хоризонтот.

За Битола се препорачуваат повисоките позиции на Пелистер и околните ридови.

Како добра позиција се посочува и гостиварскиот регион, особено околината на Корито на Сува Гора.

Пожелно е набљудувачите да бидат на избраната локација најдоцна околу 19:15 часот.

Не гледајте директно во Сонцето

За набљудување мора да се користат сертифицирани очила за затемнување со ознака ISO 12312-2.

Обичните очила за сонце не обезбедуваат соодветна заштита.

Не треба да се користат ниту затемнето стакло, ЦД, рендгенски филм или други импровизирани средства.

Камери, телефони, двогледи и телескопи исто така не треба директно да се насочуваат кон Сонцето без соодветен соларен филтер.

Астрономски богата ноќ

Затемнувањето се случува во период кога активен е и метеорскиот дожд Персеиди.

Неговата најголема активност се очекува во ноќта меѓу 12 и 13 август.

Денешното делумно затемнување на Сонцето затоа е само еден од астрономските настани што неделава можат да ги следат љубителите на небото во Македонија.