(Видео)Левица ја напушти седницата на Советот на Град Скопје: Обвинува за ограничување на дебатата
31/08/2026 11:19
Левица ја напушти седницата на Советот на Град Скопје. Во знак на протест поради начинот на кој се одржуваат советничките прашања, тие одлуката ја соопштија од говорницата. Од партијата обвинуваат дека новиот модел ја ограничува можноста за дебата и непосредно соочување со градската власт.
Според Левица, советниците се принудени сите прашања да ги постават на почетокот на седницата. Одговорите потоа ги добиваат заедно, без можност веднаш да реагираат или да постават дополнително прашање.
Од партијата велат дека на ваквиот начин на работа се спротивставиле уште на претходната седница за советнички прашања.
Левица: Се ограничува советничкиот надзор
Во соопштението се наведува дека советничките прашања се еден од основните механизми за контрола на градската власт. Преку нив, како што посочуваат, советниците треба да бараат одговорност од градоначалникот, директорите на јавните претпријатија и градската администрација.
Левица тврди дека со новиот модел се губи суштината на овој механизам. Како проблем ја посочува неможноста веднаш да се постави дополнително прашање доколку советникот смета дека не добил конкретен одговор.
Партијата обвинува и дека ваквиот начин на водење на седницата претставува прекршување на Деловникот за работа на Советот на Град Скопје.
Обвинувања кон Ѓорѓиевски и ВМРО-ДПМНЕ
Левица тврди дека начинот на одржување на седниците се наметнува според волјата на советниците на ВМРО-ДПМНЕ и градоначалникот Орце Ѓорѓиевски.
„Советот на Град Скопје не е продолжена рака на градоначалникот, ниту советниците се статисти во однапред режирана претстава“, се наведува во партиското соопштение.
Критики се упатени и кон СДСМ. Од Левица велат дека советниците на оваа партија останале на седницата и со тоа, според нив, го поддржале ваквиот начин на работа.
Бараат можност за дополнителни прашања
Според Левица, непосредната дебата е неопходна за советниците да можат да укажат кога одговорот е избегнат или нецелосен. Партијата смета дека сегашниот модел овозможува одговорите да се сведат на однапред подготвени реплики.
Од советничката група порачаа дека нема да учествуваат во, како што велат, „симулација на демократија“ во која се ограничува контролата врз градската власт.
Како протест поради, според нив, прекршувањето на Деловникот и деградирањето на улогата на советниците, Левица ја напушти седницата на Советот на Град Скопје.
Левица ја напушти седницата на Советот на Град Скопје. Во знак на протест поради начинот на кој се одржуваат советничките прашања, тие одлуката ја соопштија од говорницата. Од партијата обвинуваат дека новиот модел ја ограничува можноста за дебата и непосредно соочување со градската власт.
