Градоначалникот Герасимовски: “Без мобилни телефони за време на настава”

Во сите основни училишта во Општина Центар беше усвоена препораката на општинските власти за забрана на користењето на мобилни телефони за време на наставата. Доколку некој ученик биде уловен со втор мобилен телефон, тој ќе биде одземен и вратен на родителите.

Градоначалникот на Општина Центар, Горан Герасимовски, денес на својот фејсбук-профил ја соопшти оваа информација, истакнувајќи дека целта на препораките е да се зголеми безбедноста во училиштата, особено по неодамнешните инциденти поврзани со социјалните мрежи, кои довеле до повреди на ученици.

Препораките, кои се базирани на советите на УНЕСКО од јули 2023 година, се однесуваат на негативните ефекти од прекумерната употреба на мобилните телефони врз процесот на учење. Герасимовски нагласува дека многу европски земји веќе ја прифатиле оваа практика во своите образовни системи. Истражувањата спроведени од УНЕСКО покажуваат дека мобилните телефони го одвлекуваат вниманието на учениците, а особено негативно влијаат на децата со потешкотии во учењето. Се додава дека без мобилни телефони учениците повеќе се социјализираат, што поттикнува позитивна меѓусебна интеракција.

Општина Центар продолжува со напорите за подобрување на условите за едукација и воспитание, создавајќи здраво и балансирано опкружување за развој на младите генерации.