Италијанската таеквондо федерација ги нарече условите на натпреварите во Скопје „опасни по здравјето“ – побарана одговорност
28/07/2025 11:11
Претседателот на Италијанската таеквондо федерација, Анџело Чито, изрази сериозна загриженост и разочараност во врска со условите за одржување на европските таеквондо натпревари во Скопје. Тој ги оцени како „опасни по здравјето на спортистите“, нарекувајќи ги „срамни и недозволиви за едно европско спортско натпреварување“.
Опасни услови и негрижа кон спортистите
„Младите спортисти покажаа огромна пожртвуваност, но тоа што го доживеавме е апсолутно неприфатливо,“ изјави Чито. „Натпреварите се одржаа во услови кои не само што не беа достојни за професионален спорт, туку беа и опасни по здравјето на учесниците – распаднати објекти, хигиенски услови на раб на прифатливото, чести прекини на натпреварите и температури блиски до 50°C, без вентилација поради чести прекини на електричната енергија.“
Според него, ваквата ситуација претставува „понижување за спортот и негрижа кон младите таленти“. Чито додаде дека дел од спортските сали се изградени, но биле претворени во ресторани, па организаторите користеле реквизити собрани од домашни теретани.
Последици и реакции
Претседателот на федерацијата потврди дека за време на натпреварите имало три случаи на спортисти кои се онесвестиле поради условите во салата. „Се достигна апсурдно ниво – во кој било друг контекст, ќе го повлечев целиот тим. Ова е непочитување кон спортистите и кон спортот,“ нагласи Чито.
Тој упати порака до Европскиот олимписки комитет, барајќи гаранции дека вакви ситуации нема да се повторат и некој ќе понесе одговорност за пропустите во организацијата.
Објект од 1930-тите и лоша организација
Чито изјави дека натпреварите се одржувале во објект изграден во 1930-тите, со ужасни санитарни услови и чести прекини на натпреварите кои траеле и до шест часа. „Во целата моја кариера никогаш не сум видел нешто слично,“ додаде тој.
Претседателот на Италијанската таеквондо федерација, Анџело Чито, изрази сериозна загриженост и разочараност во врска со условите за одржување на европските таеквондо натпревари во Скопје. Тој ги оцени како „опасни по здравјето на спортистите“, нарекувајќи ги „срамни и недозволиви за едно европско спортско натпреварување“.
