Кина им нуди на родителите 1.300 евра за да имаат повеќе деца
31/07/2025 19:11
Ова е прва национална субвенција од ваков вид во Кина, додека владата се обидува да се справи со растечката демографска криза.
На родителите во Кина им се нудат 3.600 јуани (500 долари или околу 430 евра) годишно за секое дете под три години во првата национална субвенција на владата насочена кон зголемување на стапката на наталитет.
Стапката на наталитет во земјата опаѓа, дури и откако владејачката Комунистичка партија ја укина контроверзната политика за едно дете пред речиси една деценија.
Програмата ќе им помогне на речиси 20 милиони семејства со трошоците за одгледување деца, објавија државните медиуми.
Неколку провинции низ Кина веќе исплатија одредени суми за да ги охрабрат луѓето да имаат повеќе деца во услови на претстојна демографска криза со која се соочува втората по големина економија во светот.
Според планот, објавен на 28 јули, на родителите ќе им бидат понудени вкупно до 10.800 јуани (1.500 долари или 1.300 евра) по дете.
Одлуката ќе се применува ретроактивно од почетокот на оваа година, објави кинескиот државен радиодифузер CCTV.
Семејствата со деца родени помеѓу 2022 и 2024 година, исто така, можат да аплицираат за делумни субвенции.
Овој потег доаѓа во време кога локалните самоуправи се обидуваат да ја зголемат стапката на наталитет во Кина.
Во март, Хохот, град во северниот регион на Кина, почна да им нуди на жителите до 100.000 јуани (речиси 14.000 долари или 12.000 евра) по бебе за парови со најмалку три деца.
Шенјанг, град североисточно од Пекинг, нуди 500 јуани (70 долари или 60 евра) месечна помош за локалните семејства со трето дете под тригодишна возраст.
Властите во Пекинг неодамна ги повикаа локалните самоуправи да изготват планови за спроведување бесплатно предучилишно образование.
Кина е меѓу најскапите места во светот за раѓање деца, во релативна смисла, според студијата на кинескиот Институт за истражување на населението ЈуВа.
Студијата покажа дека одгледувањето дете во Кина до 17 години чини просечно 75.700 долари (повеќе од 65.400 евра).
Во јануари, официјалните податоци покажаа дека населението на Кина се намалило трета година по ред во 2024 година.
Вкупно 9,54 милиони бебиња се родени во Кина во 2024 година, според Националното биро за статистика.
Тоа е мало зголемување во однос на претходната година, но намалувањето на населението во земјата продолжи.
Населението на Кина, нација од 1,4 милијарди луѓе, исто така брзо старее, што ги зголемува демографските проблеми.
