Вучиќ по средбата со Путин: Соработката со Русија е клучна за иднината на Србија
02/09/2025 19:43
Претседателот на Србија, Александар Вучиќ, денес по средбата со претседателот на Руската Федерација, Владимир Путин, истакна дека партнерството со Русија е од суштинско значење за стабилноста и развојот на Србија.
„Соработката на највисоко ниво со Русија е многу важна за Србија. Се надевам дека ќе успееме не само да ја зачуваме, туку и да ја унапредиме во бројни области. Енергијата, особено снабдувањето со гас, е од големо значење за стабилноста на нашата земја“, изјави Вучиќ.
Тој потсети дека гасоводот до Унгарија веќе донел подобрувања во енергетската соработка, а следниот чекор ќе биде изградбата на нафтовод меѓу Србија и Унгарија. Вучиќ нагласи дека Србија е отворена за сите руски компании кои сакаат да инвестираат во инфраструктурни и енергетски проекти, вклучувајќи ги „РЖД“ и „Росатом“.
Српскиот претседател му се заблагодари на Путин за гостопримството и поддршката, особено за почитувањето на територијалниот интегритет на Србија. „Вашиот пријателски став кон српскиот народ е од големо значење за нас“, додаде Вучиќ.
Средбата се одржа во рамките на посетата на Вучиќ на Народна Република Кина, по покана на претседателот Си Џинпинг, каде што ќе присуствува на одбележувањето на 80-годишнината од победата во Втората светска војна.
Во разговорите со Путин било потврдено дека Србија и понатаму ќе остане на својата принципиелна позиција. „И покрај притисоците од почетокот на украинската криза, Србија успеа да ја зачува независноста и останува единствената земја во Европа која не вовела санкции против Русија“, истакна Вучиќ.
