Македонија со длабока демографска криза: 3500 повеќе починати од новородени до септември
27/11/2025 22:46
Негативниот природен прираст во земјава продолжува да се продлабочува, покажуваат најновите податоци на Државниот завод за статистика. Во првите девет месеци од годинава бројот на починати лица е поголем од бројот на новородени за дури 3.425 лица, што е значајно полошо од истиот период лани, кога разликата изнесуваше 2.440.
Според статистиката, во периодот јули–септември се родиле 4.431 бебиња, додека починале 4.849 лица – негативна разлика од 418. Иако ова е нешто подобро од првиот и вториот квартал, трендот останува загрижувачки. Вкупно од јануари до септември се евидентирани 11.689 раѓања, наспроти 15.123 смртни случаи.
Иако во летните месеци има мало зголемување на бројот на раѓања (3,7% повеќе од лани), очекувањата се дека до крајот на годината бројката ќе биде околу 16.000 – далеку под бројките од минатите години. За споредба, во 2020 година имало над 19.000 новороденчиња, а во 2015 – повеќе од 23.000.
Негативниот природен прираст е присутен во речиси сите осум статистички региони. Ако се додаде и масовната емиграција, демографската слика станува уште посериозна. Според Меѓународниот центар за развој на миграциска политика, македонската дијаспора брои околу 693.896 лица, од кои најголем дел живеат во ЕУ, САД, Канада и Австралија.
Паралелно со ова, се бележи и намалување на бројот на склучени и разведени бракови. Заклучно со септември, регистрирани се 8.152 брака, што е помалку од 8.686 лани, а бројот на разводи исто така е намален – 1.480 годинава, наспроти 1.508 во истиот период минатата година.
Негативниот природен прираст во земјава продолжува да се продлабочува, покажуваат најновите податоци на Државниот завод за статистика. Во првите девет месеци од годинава бројот на починати лица е поголем од бројот на новородени за дури 3.425 лица, што е значајно полошо од истиот период лани, кога разликата изнесуваше 2.440.
