Борисов панично го повлече предлог буџетот по протестите на улиците во Софија

27/11/2025 11:52

Во Бугарија се продлабочува политичката драма по жестоките реакции на граѓаните кон предложениот државен буџет за 2026 година. Илјадници демонстранти излегоа на ноќни протести пред Собранието, а напнатоста беше голема и во самата пленарна сала.

Лидерот на ГЕРБ, Бојко Борисов, јавно објави дека му наложил на премиерот Росен Жељасков – исто така член на неговата партија – да го повлече буџетот. Според Борисов, власта мора да ги слушне барањата на граѓаните и да ги преиспита параметрите што предизвикаа масовно незадоволство.

„Овој буџет не може да помине во ваква форма“, изјави Борисов, додавајќи дека Владата мора да најде правно решение за повлекување, иако документот е усвоен на прво читање.

Борисов нагласи дека, дури и ако нов буџет не биде донесен до Нова година, Бугарија може да влезе во еврозоната со привремено финансирање врз основа на досегашниот буџет – нешто што, како што тврдеше, „не е фатално и нема да предизвика проблем“.

Протестите кулминираа ноќта меѓу четврток и петок, кога според проценките повеќе од 70.000 граѓани се собраа во „Триаголникот на моќта“ во Софија. Дел од пратениците, по завршувањето на работата на буџетската комисија, дури не можеле да ја напуштат зградата на Собранието поради блокадите.

Настаните потсетија на протестите од 2013 година, кога исто така беше нападнат „бел автобус“ во обид да се евакуираат пратениците.

Бугарија останува во неизвесност: буџетот за 2026 е блокиран, а политичката криза продолжува во клучен момент – само неколку месеци пред планираната интеграција во еврозоната.