Кина ги повика САД да продолжат разговори со Русија за стратешката стабилност
06/02/2026 21:34
Кина упати апел до Соединети Американски Држави да ги продолжат разговорите со Русија за стратешката стабилност и идните аранжмани по истекот на договорот за намалување на стратешкото вооружување, соопшти кинеското Министерство за надворешни работи.
Портпаролот на министерството, Лин Џијан, на редовната прес конференција истакна дека ваквиот дијалог е „заедничко очекување на меѓународната заедница“, нагласувајќи дека зачувувањето на глобалната стратешка стабилност е од клучно значење во услови на зголемени геополитички тензии.
На новинарско прашање во врска со предлогот на американскиот претседател Доналд Трамп за развој на нов, унапреден и долгорочен договор со Русија, кој би го заменил договорот „Нов СТАРТ“, Лин Џијан изјави дека Пекинг не е запознаен со деталите на иницијативата.
Сепак, тој нагласи дека Кина доследно го поддржува дијалогот и дипломатските напори меѓу големите сили како средство за спречување на трка во вооружување и за одржување на меѓународната безбедност.
„Кина секогаш поддржува разговори и дипломатски иницијативи насочени кон зачувување на глобалната стратешка стабилност“, порача портпаролот на кинеското МНР.
