Трамп со ултиматум до Иран: „Положете оружје или следува сигурна смрт“

Американскиот претседател Доналд Трамп упати директен повик до припадниците на Корпусот на Исламската револуционерна гарда и вооружените сили на Иран да го положат оружјето, ветувајќи им имунитет доколку се откажат од борбените активности. Во спротивно, како што изјави, ги очекува „сигурна смрт“.

Трамп соопшти дека САД започнале „големи борбени операции“ во Иран, предупредувајќи дека е можно да има американски жртви. Нападите, според него, имаат за цел уништување на иранските ракетни капацитети и морнарицата.

„Не ја давам оваа изјава лесно. Иранскиот режим сака да убива“, изјави Трамп во видео објавено на неговата социјална мрежа Truth Social.

„Животите на храбрите американски херои може да бидат изгубени и може да има жртви што се вообичаени во војна, но ние го правиме тоа за иднината. Тоа е благородна мисија“, додаде тој.

Овие изјави доаѓаат по серијата разговори меѓу Вашингтон и Техеран за нуклеарните амбиции на Иран, од кои последниот се одржал завчера без конкретен договор.

„Иран одби, исто како што тоа го правеше со децении. Тие одбија секоја можност да се откажат од своите нуклеарни амбиции и ние повеќе не можеме да го поднесеме тоа“, истакна Трамп.

Ескалацијата на реториката и воените активности дополнително ги зголемуваат тензиите на Блискиот Исток, додека меѓународната заедница повикува на дипломатско решение за да се избегне поширок регионален конфликт.