Иранскиот Корпус на Исламската револуционерна гарда (ИРГК) синоќа соопшти дека има „целосна контрола“ врз Ормускиот теснец, една од најважните светски поморски рути за транспорт на нафта.
„Во моментов, Ормускиот теснец е под целосна контрола на поморските сили на Исламската Република“, изјави Мохамад Акбарзаде, висок командант во поморските сили на гардата, цитиран од иранската агенција Фарс.
Трамп: Можна придружба на танкерите
Американскиот претседател Доналд Трамп изјави дека бродовите на американската морнарица би можеле да ги придружуваат танкерите со нафта низ теснецот „доколку е потребно“.
Ормускиот теснец претставува клучна транзитна точка за глобалната трговија со енергенси, бидејќи преку него секојдневно поминува значителен дел од светската нафта и течен природен гас.
Нови тврдења за напад врз THAAD
Претходно, ИРГК соопшти дека погодила втор американски систем за воздушна одбрана THAAD, пренесе иранската новинска агенција ИРНА. Овие информации засега немаат независна потврда од американска страна.
Ескалацијата доаѓа по заедничката воена операција на САД и Израел против Иран, по што иранските сили започнаа напади врз израелска територија и американски воени бази во Персискиот Залив.
Меѓународните аналитичари предупредуваат дека евентуално затворање или нарушување на пловидбата низ Ормускиот теснец би имало сериозни последици врз глобалната економија и цените на енергенсите.
