Трамп: Со Џинпинг решивме многу различни проблеми што другите луѓе не можеа да ги решат
15/05/2026 9:52
U.S. President Donald Trump, right, and Chinese President Xi Jinping attend a welcome ceremony at the Great Hall of the People in Beijing, Thursday, May 14, 2026. (Maxim Shemetov/Pool Photo via AP)
Американскиот претседател Доналд Трамп изјави дека со кинескиот претседател Си Џинпинг разговарал за војната во Иран и дека двајцата лидери се согласиле оти Техеран не смее да поседува нуклеарно оружје.
Трамп додаде дека заеднички став имале и за Ормутскиот теснец. Според него, преминот треба да остане отворен за пловидба.
Последната сесија од разговорите меѓу Трамп и Си се одржа денеска во Пекинг. Американскиот претседател претходно изјави дека добил понуда за кинеска помош за повторно отворање на Ормутскиот теснец, како и ветување за голема нарачка на авиони „Боинг“.
Двајцата лидери утрово се сретнаа во резиденцијалниот комплекс Џонгнанхај во Пекинг. Светските агенции објавија фотографии од нивното ракување во градината на комплексот.
„Решивме многу различни проблеми што другите луѓе не можеа да ги решат“, изјави Трамп по средбата.
Според агендата, двајцата лидери имале разговори на чај, по што следел работен ручек. Трамп потоа треба да ја заврши посетата и да замине за САД.
Американскиот претседател повторно нагласи дека неговиот однос со Си Џинпинг е многу силен. Воедно, порача дека Кина и САД нашле заеднички јазик за едно од најчувствителните прашања на Блискиот Исток.
Посетата на Трамп на Кина се одвива во време на зголемени тензии во регионот, по конфликтот со Иран и затворањето на Ормутскиот теснец.
