Странски државјанин со фирма ја оштетил Македонија за 11 милиони евра, 9 милиони од ИПА сега ќе ги плаќа државата

Финансиската полиција поднесе кривична пријава против странски државјанин и правно лице, поради сомнежи за злоупотреби поврзани со проект во Кичево.

Според соопштението, станува збор за лицето С.Г.О.Б., сопственик и управител на фирма, како и за самото правно лице. Пријавата е поднесена до Основното јавно обвинителство Скопје.

Случајот се однесува на проектот „Рехабилитација и проширување на канализационата мрежа во Општина Кичево“. Договорот бил склучен во 2023 година со Министерството за финансии, во рамки на ИПА II програмата за животна средина и климатски акции.

Што утврдила Финансиската полиција

Од Финансиската полиција тврдат дека пријавениот бил должен да обезбеди важечка банкарска гаранција. Но, според нивните наводи, го прикрил стечајот на азербејџанската „Муганбанк“, која ја издала гаранцијата.

Со тоа, како што наведуваат, не било откриено дека повеќе не постои валиден инструмент за обезбедување на договорот.

Дополнително, без претходно одобрение од Министерството за финансии и од надзорниот орган, биле ангажирани подизведувачи. И тоа, според соопштението, било спротивно на договорните обврски.

Поради утврдените неправилности, договорот бил раскинат.

Штетата се мери во милиони

Финансиската полиција тврди дека со овие дејствија е направена штета на буџетот во износ од 127.425.036 денари.

Покрај тоа, посочува и загуба на ИПА средства во износ од 9.474.132 евра. Тоа значи дека овие пари, според нив, државата ќе треба да ги обезбеди од сопствени средства.

Кога ќе се пресмета и буџетската штета и загубените европски средства, станува збор за сума од околу 11 милиони евра.

Така, странски државјанин со фирма ја оштетил Македонија за 11 милиони евра, а најголемиот дел од таа сума се однесува на средства од ИПА програмата што сега ќе паднат на товар на државата.

Share on Facebook

Tweet

Follow us

Save