Москва предупредува: НАТО се подготвува за војна со Русија до 2030 година
Рускиот заменик-министер за надворешни работи Александар Грушко изјави дека земјите-членки на НАТО систематски се подготвуваат за воен конфликт со Русија, кој би можел да се случи околу 2030 година, пренесуваат руските медиуми.
Агресивни намери кон Русија
Грушко истакнал дека анализата на политиката на Алијансата и на Европската Унија укажува на сè помали разлики меѓу нив од воена перспектива. Според него, главна цел на НАТО е да ѝ нанесе стратешки пораз на Русија.
„Секако, претпоставуваме дека тие навистина се подготвуваат за воен конфликт со Русија околу 2030 година“, изјавил Грушко.
Лавров: Европа купува време со крвта на Украинците
Минатата недела, рускиот министер за надворешни работи Сергеј Лавров, во авторски текст насловен „Украина, Европа и глобалната безбедност“, напишал дека Европа на различни начини се обидува да добие време за да постигне целосна воена подготвеност за евентуален конфликт со Русија.
Лавров потсетил на изјавата на началникот на Генералштабот на Белгија, кој, како што рекол, цинично истакнал дека Европејците имаат уште неколку години благодарение на крвта на Украинците, што им купува драгоцено време.
Нуклеарна закана како можен исход
Според Лавров, моменталната меѓународна ситуација носи реален ризик од директен конфликт меѓу НАТО и Русија, кој брзо би можел да ескалира во размена на нуклеарни напади. Рускиот министер апелирал на внимателност, оценувајќи ја безбедносната ситуација во Европа како исклучително напната.
