Западен Балкан бара итно решение од ЕУ за престојот на возачите во Шенген
Професионалните возачи на камиони од Македонија, Србија, Босна и Херцеговина и Црна Гора би можеле да се соочат со сериозни проблеми доколку до 10 август не биде пронајдено решение за нивниот престој во Шенген зоната. Четирите држави ѝ поставија рок на Европската комисија да понуди системско решение за ограничувањето според кое возачите можат да престојуваат најмногу 90 дена во период од 180 дена.
Според превозниците, сегашните правила сериозно го отежнуваат меѓународниот транспорт и ја доведуваат во прашање редовната испорака на стока.
Европската комисија сè уште без конкретен одговор
Претседателот на Здружението за меѓународен транспорт на Србија, Неџо Мандиќ, изјави дека Европската комисија одговорила на заедничкото барање на четирите земји, но засега нема конечно решение.
Тој посочува дека една од опциите е користење визи од тип Д, но останува нејасно дали тие ќе овозможат подолг престој во целата Шенген зона или само во државата што ја издала визата.
Според сегашните толкувања, визата би овозможила неограничен престој само во земјата издавач, додека за останатите членки на Шенген и понатаму би важело ограничувањето од 90 дена во рок од шест месеци.
Различни ставови меѓу земјите-членки
Мандиќ вели дека земјите од Европската Унија немаат усогласен пристап кон ова прашање. Дел од нив сметаат дека е потребно единствено европско решение, додека други се подготвени да помогнат преку национални модели.
Како пример ја посочува Хрватска, која веќе овозможи издавање визи од тип Д за професионални возачи, но моделот е ограничен главно на транспорт поврзан со хрватскиот пазар, што не ги решава проблемите на превозниците кои најчесто вршат транзитен превоз.
Според него, Италија и Словачка покажале подготвеност за разговори, додека Унгарија засега се залага за билатерален пристап.
Последиците може да ги почувствуваат и извозниците
Од транспортниот сектор предупредуваат дека евентуалните ограничувања нема да ги погодат само превозниците, туку и компаниите кои зависат од нивните услуги.
Доколку камионите не можат непречено да сообраќаат, ќе бидат загрозени испораките, извозот и работењето на бројни компании, додека транспортните фирми ќе продолжат да ги подмируваат трошоците за кредити, лизинг, плати и останати обврски без можност за нормално работење.
Превозниците потсетуваат дека токму компаниите од Западен Балкан имаат значајна улога во транспортот кон Европската Унија, бидејќи многу европски оператори избегнуваат да работат во регионот поради долгите гранични процедури и царинските формалности.
