Николоски: Започнуваме со изградба на автопатот Кичево – Букојчани, целосно ќе ги поврземе Скопје и Охрид
09/02/2025 9:58
Започнуваме изградба на нов автопат од Кичево до Букојчани. До пролет или лето ќе избереме изведувач, а во меѓувреме обезбедивме поволен кредит и неповратни средства од ЕБРД за изградбата, изјави вицепремиерот и министер за транспорт, Александар Николоски, во гостувањето на ТВ Сител.
Тој потенцира дека токму оваа делница недостасува за целосно автопатско поврзување од Скопје до Охрид и додава дека теренот е исклучително тежок, што претставува голем предизвик за инженерите.
„Во моментов градиме автопат од Охрид до Кичево, а исто така се гради и од Тетово преку Гостивар до Букојчани, што ќе го реши проблемот со превојот Стража. Оно што недостасува е делницата од Букојчани до Кичево. Решивме да го изградиме и на тој начин целосно ќе ги поврземе Скопје и Охрид, како и Струга и Кичево. Со ЕБРД обезбедивме поволен кредит во вредност од 123 милиони евра, а од нив 20 милиони евра се грант, што претставува 20% од вкупната вредност на патот. Во моментов имаме претквалификација и очекувам да се избере изведувач до лето. Овој проект ќе биде завршен до крајот на 2028 година, а делницата од Охрид до Кичево ќе биде готова следната година, со што ќе имаме целосно поврзување. Делницата е долга околу 12 километри, но теренот е многу тежок и инженерите ќе имаат сериозни предизвици, но се нафативме и ќе го решиме“, истакна Николоски.
Тој најави дека се прават законски измени кои ќе се разгледуваат на владина седница следната недела, а кои ќе го олеснат процесот на изградба на автопатот Кичево – Охрид. Николоски додаде дека до почетокот на летната сезона, 40 километри од автопатот од Врбјани до Охрид ќе бидат пуштени во сообраќај, со мал пресек кај Ботун, поради стабилизација на косините.
