Авионска несреќа во Торонто: 18 повредени при превртување на авион на Делта Ерлајнс
18/02/2025 9:58
Најмалку 18 лица се повредени, од кои три потешко, при авионската несреќа што се случи во понеделникот, кога авион на американската компанија Делта Ерлајнс се преврте при слетувањето на меѓународниот аеродром Пирсон во Торонто.
Шефот на аеродромот во Торонто, Тод Ајткин, потврди дека сите 18 повредени патници биле пренесени во локалните болници. Според него, истрагата за причините за несреќата е во тек, но додаде дека пистата била сува и немало страничен ветер во моментот на слетувањето.
„Причината за несреќата сѐ уште се истражува, а истрагата ја води Управата за безбедност во сообраќајот. Не е соодветно за нас да коментираме во овој момент“, изјави Ајткин.
Меѓу тројцата тешко повредени има и едно дете, кое било пренесено во детската болница во Торонто. Среќа е што сите 80 патници во авионот успеале да преживеат, иако за време на инцидентот биле висат наопаку, како лилјаци.
„Среќен сум што дознав дека сите патници и членови на екипажот се живи по оваа авионска несреќа во Торонто Пирсон. Ви благодарам на првите кои реагираа, како и на екипажот и персоналот на аеродромот за нивната брза реакција и посветеност да обезбедат безбедност за сите“, напиша градоначалничката на Торонто, Оливија Чоу, на платформата X.
Авионот кој се преврте е типот Мицибуши ЦРЈ-900LR, помал авион кој летал на летот 4819 од Минеаполис до Торонто. Несреќата се случила околу 14:45 часот по локално време.
Оваа несреќа во Торонто се случи по неколку други трагични инциденти во Северна Америка. Недавно, хеликоптер на американската армија се судри со патнички авион ЦРЈ-700 во Вашингтон, при што загинаа 67 лица, додека седум лица загинаа при уривањето на медицински транспортен авион во Филаделфија, а 10 лица загинаа во несреќа на авион на Аљаска.
