Претседателот на Н.Р. Кина Си Џинпинг, за руски медиуми. Од борба до партнерство: Кина и Русија во служба на глобалниот мир
10/05/2025 19:15
За руските медиуми, претседателот на Н.Р. Кина, го инесе следново:
Оваа година се навршуваат 80 години од победата во Кинеската народна војна против јапонската агресија, Големата патриотска војна на Советскиот Сојуз и глобалната антифашистичка борба, како и од основањето на Обединетите нации (ООН). Во овој контекст, ќе ја посетам Русија за да учествувам на одбележувањето на годишнината од победата и да оддадам почит на хероите што го жртвуваа животот за слободата.
Пред десет години присуствував на 70-годишнината од истата победа и се сретнав со руски ветерани кои се бореле заедно со кинескиот народ. Денес им оддаваме почит и на оние што повеќе не се со нас, славејќи го нивниот дух што вечно живее.
Кинескиот и рускиот народ се бореа рамо до рамо против фашизмот. Советската поддршка во воздушните борби и воена помош беше клучна, додека Кина помогна со стратешки ресурси и разузнавачки информации. Тоа другарство, родено во жртва и борба, останува силно и непроменето.
Втората светска војна ја покажа победата на правдата над злото. Денес, соочени со нови закани како хегемонизмот и унилатерализмот, мора да се потсетиме на историјата и да се залагаме за соработка, дијалог и мир. Не смееме да дозволиме прекројување на историските факти или потценување на улогата на Кина и Советскиот Сојуз.
ООН е плод на таа победа. Кина и Русија, постојани членки на Советот за безбедност, имаат обврска да го зачуваат меѓународниот поредок заснован на Повелбата на ООН, да поддржат мултиполарен свет и правична глобализација.
Тајван е составен дел од Кина, како што е потврдено во меѓународните документи по Втората светска војна. Без разлика на надворешни влијанија, обединувањето на Кина е неизбежен историски процес. Русија цврсто ја поддржува кинеската позиција.
Кина предложи глобални иницијативи за развој, безбедност и цивилизација, стремејќи се кон поправеден меѓународен поредок. Во време на глобални предизвици, потребна е соработка наместо конфронтација, и вистински мултилатерализам наместо доминација.
Кина и Русија се стабилни сили во светот. Нашето пријателство не зависи од трети страни и не смее да биде загрозено од надворешни влијанија. Заедно можеме да ја зајакнеме стратешката стабилност и да изградиме подобра иднина.
Како големи нации со славно наследство, должни сме да ги заштитиме нашите интереси и да работиме за глобална правда. Нека нашето сојузништво и визија заедно водат кон посветла иднина за целото човештво.
