ШЕФЕРОВИЌ: Трговскиот договор со САД треба да се базира на „почитување“, а не на „закани“

Европската Унија се залага трговските односи со САД да се темелат на „почитување“, наместо на „закани“, изјави европскиот комесар за трговија, Марош Шефчовиќ, откако американскиот претседател Доналд Трамп се закани со царини од 50% на европскиот увоз.

„ЕУ останува целосно посветена на постигнување фер договор кој ќе биде од интерес за двете страни“, напиша Шефчовиќ на социјалната мрежа X, по средбата со трговскиот претставник на САД, Џејмисон Грир, и американскиот секретар за трговија, Хауард Лутник.

Тој додаде дека трговијата меѓу двете страни мора да се води од соработка и разбирање, а не од закани, и нагласи дека ЕУ ќе ги заштити своите интереси доколку е потребно.

На почетокот на мај, Унијата предупреди дека може да воведе контрамерки – царини на американски увоз во вредност од 95 милијарди долари, меѓу кои и на автомобили и авиони – доколку разговорите со Вашингтон не дадат резултати.

Европската комисија исто така најави дека ќе ги пријави американските трговски мерки до Светската трговска организација (СТО), како дел од формална постапка.

Во изминатите месеци, ЕУ се соочи со неколку рунди царини од страна на САД: 25% на челик и алуминиум, дополнителни 25% на автомобилите и 20% на останати европски производи. Иако дел од овие мерки се суспендирани до јули заради можни преговори, царини од 10% сè уште се применуваат на поголемиот дел од европскиот извоз во САД.

Претседателот Трамп, кој повторно е на чело на Белата куќа, често ја критикува Европа и неодамна изјави дека ЕУ е „полоша од Кина“ во трговските односи.

САД проценуваат дека нивниот трговски дефицит со ЕУ во размена на стоки во 2024 година изнесува 235 милијарди долари. Сепак, според Европската комисија, трговскиот суфицит на САД во услугите значително го намалува тој дефицит – на околу 50 милијарди евра (приближно 57 милијарди долари).

Share on Facebook

Tweet

Follow us

Save