Трамп предвреме си замина од Г7: „Поради Блискиот Исток“ – понуден прекин на огнот меѓу Израел и Иран
17/06/2025 9:57
Американскиот претседател Доналд Трамп го прекина учеството на самитот на Г7 во Канада и замина еден ден порано, поради ескалацијата на конфликтот меѓу Израел и Иран. Според Белата куќа, неговото заминување било предизвикано од итноста на ситуацијата на Блискиот Исток.
„Многу беше постигнато, но поради она што се случува на Блискиот Исток, претседателот Трамп ќе замине вечерва по вечерата со шефовите на држави“, изјави портпаролката Каролин Ливит.
Францускиот претседател Емануел Макрон откри дека Трамп изнел иницијатива за прекин на огнот меѓу Израел и Иран. „Навистина постои понуда за средба и размена на мислења… Сега треба да видиме дали страните ќе следат“, рече Макрон.
Г7 усвои заедничка изјава со повик за смирување на тензиите, повикувајќи на прекин на огнот и во Газа. Истовремено, групата го поддржа правото на Израел на самоодбрана, нарекувајќи го Иран „извор на нестабилност“.
Трамп повторно го критикуваше исклучувањето на Русија од Г8 по анексијата на Крим, велејќи: „Ова беше голема грешка … Путин ми зборува мене. Тој не зборува со никого друг.“
Иако не предложи враќање на Русија во групата, неговите изјави создадоа тензии околу идната поддршка за Украина. Украинскиот претседател Зеленски треба да се обрати на самитот утре.
Поради разликите во ставовите, Канада реши да не се обидува да усвои заедничко финално соопштение. Според дипломатски извори, неколку нацрт-документи – за вештачка интелигенција, миграција и критични минерали – сè уште немаат поддршка од САД.
На маргините на самитот, Трамп и британскиот премиер Кир Стармер објавија договор за намалување на царините, а Карни и Трамп најавија можност за нов економски и безбедносен договор меѓу САД и Канада во рок од 30 дена. Канадската влада, сепак, остро се спротивстави на идејата за нови царини: „Нашиот став е дека не треба да имаме никакви царини за канадскиот извоз во САД“, изјави амбасадорката Кирстен Хилман.
