Киев повторно мета на жесток руски напад: Двајца загинати, 16 повредени и уништена инфраструктура
10/07/2025 15:32
Главниот град на Украина, Киев, синоќа беше цел на нов масовен руски напад, информира Би-би-си. Според украинскиот претседател Володимир Зеленски, во офанзивата биле употребени 18 ракети и околу 400 дронови. Најмалку две лица загинале, а 16 се повредени.
Остатоци од дронови удриле во покрив на станбена зграда во центарот на градот, предизвикувајќи пожари на повеќе локации. Жителите биле разбудени од силни експлозии и сирени, додека системите за противвоздушна одбрана се обидувале да ги пресретнат нападите.
Ова е втор ваков масовен напад врз Киев во последните неколку дена.
Полицијата потврди дека дронови погодиле осум различни градски реони, вклучувајќи станбени објекти, возила, магацини и административни згради. Градоначалникот на Киев соопшти дека еден примарен здравствен центар во Подилскиот реон е речиси целосно уништен.
Министерот за внатрешни работи Игор Клименко извести дека меѓу загинатите се 68-годишна жена и 22-годишен полицаец кој се наоѓал на станица на метрото.
Зеленски ја осуди ескалацијата на нападите и оцени дека Русија го засилува теророт врз Украина. Тој апелираше за побрза реакција од меѓународната заедница преку нови санкции и поддршка на украинската одбранбена индустрија.
„Потребно е партнерите побрзо да инвестираат во производство на оружје и нови технологии,“ изјави Зеленски.
Покрај нападите во Киев, украинските служби информираа за тројца загинати во руски воздушен напад врз Костјантивка, град во источниот дел на земјата.
Дипломатските напори за прекин на војната сè повеќе се доведуваат во прашање. Германскиот канцелар Фридрих Мерц изјави дека „дипломатијата е исцрпена“, додека портпаролот на Кремљ, Дмитриј Песков, рече дека „мирот е сè подалеку“.
Американскиот претседател Доналд Трамп, иако често критичен кон Русија, повторно изрази незадоволство од односот на Владимир Путин, нарекувајќи ги неговите изјави „празни зборови“.
Во услови на сè почести и поразорни напади врз Украина, меѓународната заедница подготвува нов пакет санкции против Русија. Прашањето за заштита на украинскиот воздушен простор ќе биде клучна тема на дводневната меѓународна конференција која започнува денеска во Рим.
Главниот град на Украина, Киев, синоќа беше цел на нов масовен руски напад, информира Би-би-си. Според украинскиот претседател Володимир Зеленски, во офанзивата биле употребени 18 ракети и околу 400 дронови. Најмалку две лица загинале, а 16 се повредени.
