Автомобил излета на железничка пруга, мајка и дете тешко повредени!
28/07/2025 12:54
На улицата „Димко Најдов“ во Велес вчера попладне се случи сериозна сообраќајна несреќа, кога автомобил излета од патот и заврши на железничка пруга, а тешко повредено беше 11-годишно девојче. Заедно со неа повредена е и нејзината мајка, но по прегледите, на детето му беше дијагностицирана сериозна повреда која наложи итен транспорт на Клиниката за детска хирургија во Скопје.
Сообраќајната несреќа се случила околу 16:20 часот кога возилото „хјундаи“ со велешки регистарски ознаки, управувано од 48-годишната жена Р.Т., излетало од коловозот. Од силината на ударот, малолетното девојче доби тешка скршеница на бутната коска, поради што лекарите во Општата болница во Велес веднаш одлучија да го пренесат на Клиниката за детска хирургија во Скопје. Нејзината мајка доби полесни повреди на колк и засега останува на лекување во Велес.
Портпаролот на болницата, д-р Ванчо Граматов, потврди дека повредите на девојчето се сериозни и бараат специјализирана хируршка интервенција. Во меѓувреме, полицијата од Секторот за внатрешни работи Велес изврши увид на местото на несреќата, а од таму соопштија дека повредените се згрижени во болницата.
На фотографијата од местото на настанот се гледа извлекувањето на возилото со помош на специјално транспортно железничко средство, кое беше користено за да се отстрани автомобилот од железничката пруга кај Стар Мост.
Истрагата за причините на несреќата е во тек, а полицијата апелира на внимателност и почитување на сообраќајните правила, особено во критичните делови од патот.
На улицата „Димко Најдов“ во Велес вчера попладне се случи сериозна сообраќајна несреќа, кога автомобил излета од патот и заврши на железничка пруга, а тешко повредено беше 11-годишно девојче. Заедно со неа повредена е и нејзината мајка, но по прегледите, на детето му беше дијагностицирана сериозна повреда која наложи итен транспорт на Клиниката за детска хирургија во Скопје.
