Во Скопје се одбележуваат 24 години од загинувањето на осумте бранители кај Љуботенски Бачила во 2001 година, со комеморации и положување цвеќе
10/08/2025 8:41
Денеска на повеќе локации во Скопје ќе се одржат комеморативни настани по повод 24-годишнината од загинувањето на осуммина бранители, припадници на резервниот состав на Армијата, кои го загубија животот на 10 август 2001 година кај месноста Љуботенски Бачила.
Делегација од Министерството за одбрана и Генералштабот на Армијата, предводена од директорот на Генералштабот, бригаден генерал Орце Јордев, ќе положи венци и свежо цвеќе на повеќе спомен-обележја: пред споменот на паднатиот бранител Томислав Настевски во Општина Ѓорче Петров, на споменикот на паднатите бранители во село Волково, на споменикот во село Љубанци и на спомен-плочата во касарната „Илинден“.
Делегација на Собранието, во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето во село Љубанци.
Општина Ѓорче Петров ќе организира оддавање почит пред спомен-чешмата на Томислав Настевски – Бумбар, во урбаната заедница Мирче Ацев, а централната комеморација ќе се одржи пред споменикот на загинатите бранители во Волково.
На 10 август 2001 година, осуммина припадници на резервниот состав на Армијата – Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски – загинаа кога нивното воено возило налета на мина на патот кон Љуботенски Бачила.
На овој ден се оддава почит и на Ацо Ангеловски, кој во 2000 година загина во Арачиново за време на вооружен напад врз полициска патрола.
Денеска на повеќе локации во Скопје ќе се одржат комеморативни настани по повод 24-годишнината од загинувањето на осуммина бранители, припадници на резервниот состав на Армијата, кои го загубија животот на 10 август 2001 година кај месноста Љуботенски Бачила.
