Политичко „добредојде“ за кандидатката Ивановска: Кривична пријава 11 часа по објавата на кандидатурата
15/08/2025 20:33
Само 11 часа откако независната кандидатка за градоначалник на Општина Центар и поранешна прва антикорупционерка, Билјана Ивановска, ја објави својата кандидатура, на нејзината врата затропале полицајци со покана поврзана со кривична пријава.
„Синоќа во 20:30 двајца полицајци ме побараа за да ми врачат кривична пријава, но јас не бев дома. Утрово веднаш отидов во Обвинителството да видам за што станува збор – ме повикуваат на разговор на 19 август. Немам што да кријам, совеста ми е чиста и не се плашам од закани и притисоци. Нашата битка е отпор против корупцијата и клиентелизмот,“ напиша Ивановска на Фејсбук.
Министерството за внатрешни работи, пак, тврди дека воопшто не води постапка против Ивановска, префрлајќи ја топката во Обвинителството: „За сите пријави и постапки единствено Обвинителството е надлежно за одговори.“
Останува прашањето – дали ова е обична случајност или класичен пример за „политичка коинциденција“, каде првиот потег кон кандидатот е од институциите, наместо од гласачите?
