Почина Клаудија Кардинале-Жената која живееше повеќе од 150 животи на филмското платно
24/09/2025 9:47
Клаудија Кардинале, гламурозен симбол на повоената италијанска кинематографија, која уживаше во долга и разновидна актерска кариера во филмот и театарот, почина на 87-годишна возраст во близина на Париз, објавија француските медиуми. „Таа ни остава наследство на слободна и инспиративна жена“, изјави нејзиниот агент Лоран Саври во порака до Франс прес.
Клаудија Кардинале, една од најиконските актерки на европското и светското кино, пораснала во Тунис во семејство со сицилијански корени. Нејзиниот влез во филмскиот свет започна во 1957 година, кога како победничка на натпревар за убавина во Тунис доби награда – патување на Венецискиот филмски фестивал.
На почетокот од својата кариера се соочи со тешкотии поради тајна бременост, резултат на злоупотребувачка врска. Во 1958 година во Лондон го роди својот син Патрик, но тоа не ја спречи да го гради својот уметнички пат.
По неколку споредни улоги, вистинскиот пробив го доживеа во 1963 година, играјќи во ремек-делото „8½“ на Федерико Фелини и во „Леопард“ заедно со Берт Ланкастер. Веднаш потоа ѝ се отворија вратите на Холивуд, каде се појави во култниот комичен хит „Пинк Пантер“ на Блејк Едвардс и во антологиското вестерн остварување „Беше еднаш на Запад“ на Серџо Леоне (1968).
Кардинале остана препознатлива по својата харизма, талент и моќ да се претвори во најразлични женски ликови – од светица, романтичарка, па сè до femme fatale. Нејзиното дело беше крунисано со бројни признанија, меѓу кои и наградата за животно дело на Берлинскиот филмски фестивал во 2002 година.
„Живеев повеќе од 150 животи – како светица, романтичарка, проститутка, секој можен лик. Прекрасно е да ја имаш оваа можност да се менуваш,“ изјави тогаш актерката, оставајќи зад себе уметничко наследство кое инспирира генерации.
Клаудија Кардинале, гламурозен симбол на повоената италијанска кинематографија, која уживаше во долга и разновидна актерска кариера во филмот и театарот, почина на 87-годишна возраст во близина на Париз, објавија француските медиуми. „Таа ни остава наследство на слободна и инспиративна жена“, изјави нејзиниот агент Лоран Саври во порака до Франс прес.
