Коцевски: Предистрага за УЈП, случајот Пулс сè уште не е завршен
01/10/2025 11:38
Државниот јавен обвинител Љупчо Коцевски потврди дека се води предистрага за вработени во Управата за јавни приходи (УЈП) и во други институции, во контекст на пожарот во дискотеката „Пулс“ во Кочани. Тој нагласи дека обвинителството сè уште не ја завршило постапката и дека е можно да бидат вклучени нови кривични дела.
Коцевски истакна дека информациите објавени од Истражувачката репортерска лабораторија (ИРЛ) не се нови за Обвинителството, бидејќи сите релевантни пораки од разговорите меѓу сопствениците на локалот и инспектори се достапни на страните во постапката — одбраната, судот и МВР.
Дополнително, објаснувајќи ја бавната динамика на случајот, јавниот обвинител посочи дека во Обвинителството се работи со ограничен број јавни обвинители, што го одложува решавањето на предметите. Независно од овие предизвици, тој уверува дека предистрагата ќе продолжи и дека институциите ќе донесат конкретни одлуки откако ќе се анализираат сите докази.
