Македонија во солзи: Последно збогум за Панчо од ДНК
16/10/2025 13:45
Македонија денеска тагува и се простува од трагично загинатиот пејач Владимир Блажев – Панчо, еден од најпознатите гласови на македонската современа музика и фронтмен на бендот ДНК.
Телото на омилениот музичар беше изложено утрово во црквата „Свети Илија“ во неговата родна населба Аеродром, каде десетици ужалени пријатели, колеги и обожаватели со солзи и цвеќе го испратија својот идол. Од 12 часот беше одржано опело, а погребот ќе се одржи во 13:30 часот на Градските гробишта Бутел во Скопје.
Во тивка болка, редици луѓе минуваа покрај ковчегот за да му оддадат последна почит на Панчо, човекот кој со својата музика обединуваше генерации. Меѓу присутните беа и бројни јавни личности од естрадата и медиумите, кои со тешки срца се разделуваа од својот пријател и соработник.
Панчо е 63-тата и последна жртва од страшната трагедија што се случи пред седум месеци во дискотеката „Пулс“ во Кочани, каде за време на концерт на ДНК избувна пожар што однесе повеќе од 60 животи, најголем дел од нив млади луѓе. Таа кобна ноќ остави незаборавна рана во македонското општество.
Со денови, социјалните мрежи се преплавени со пораки на љубов, болка и неверување. Пријатели, фанови и колеги му се простуваат со емотивни зборови и фотографии, потсетувајќи дека Панчо не беше само пејач, туку симбол на позитивна енергија, искреност и љубов кон музиката.
„Кочани нека не се повтори никогаш повеќе. Цела земја, сите што ве сакаа, нема да ве заборават. Нека Панчо почива во мир, заедно со сите оние млади животи што згаснаа во таа кобна ноќ“, напиша со длабока тага неговиот колега Никола Перевски – Пере од групата Нокаут.
Македонија се простува со уметник чија музика ќе продолжи да живее — како потсетник на добрината, талентот и светлината што ги оставаше зад себе.
