Премиерот се пофали со 120 нови полициски возила за униформираната полиција
26/12/2025 13:39
Премиерот Христијан Мицкоски преку објава на социјалните мрежи информираше дека се набавени 120 нови полициски возила, наменети за потребите на униформираната полиција.
Според него, оваа инвестиција е дел од пошироките напори на Владата за зајакнување на безбедносниот систем и подобрување на условите за работа на полицијата. Мицкоски нагласи дека поддршката на вакви проекти ќе продолжи и во иднина, бидејќи борбата против криминалот и корупцијата, како и безбедноста на граѓаните, претставуваат врвен приоритет на Владата.
Премиерот потенцираше дека Министерство за внатрешни работи има клучна улога во овој процес и дека институцијата е „нераскинлива алка“ во системот за одржување на јавниот ред и правната држава.
Во својата објава, тој упати благодарност до сите вработени во Министерството, до министерот и до полициските единици кои учествувале во реализацијата на проектот, истакнувајќи дека новата опрема треба да придонесе за поефикасно извршување на полициските задачи.
„Посакувам овие возила што помалку да се користат, тоа би значело дека ќе има помалку криминал и криминалци“, порача премиерот, алудирајќи на целта за зголемена превенција и стабилност во државата.
