Трамп ја повлече поканата до Канада за Одборот за мир

Претседателот на САД, Доналд Трамп, денеска ја повлече претходната покана до Канада за приклучување кон Одборот за мир, иницијатива насочена кон посредување и прекинување на глобалните конфликти.

Одлуката уследи откако канадскиот премиер Марк Карни одржа говор на Светски економски форум во Давос, во кој остро ги критикуваше големите сили дека ја користат економската интеграција како оружје, а царините како инструмент на политичка моќ.

„Со ова писмо, Одборот за мир ја повлекува својата покана до вас во врска со вклучувањето на Канада во она што ќе биде најпрестижниот Комитет на лидери некогаш собран“, напиша Трамп во објава на Truth Social, директно обраќајќи му се на Карни.

Минатата недела, канцеларијата на канадскиот премиер соопшти дека Канада ја прифатила поканата и планирала активно учество во комитетот. Говорот на Карни во Давос, во кој тој повика на прифаќање на крајот на светскиот поредок базиран на правила, беше поздравен со стоечки овации.

Карни изјави дека Канада, која неодамна потпиша трговски договор со Кина, може да биде пример како „средните сили“ можат да соработуваат и да се спротивстават на негативните ефекти од американската хегемонија.

Трамп возврати со остра реторика, изјавувајќи дека Канада „живее поради Соединетите Американски Држави“ и дека Карни треба да биде благодарен за американската поддршка.
„Запомнете го тоа, Марк, следниот пат кога ќе дадете изјава“, порача Трамп.

Повлекувањето на поканата дојде само неколку часа по официјалното формирање на комитетот, чија првична цел е посредување за прекин на огнот во Газа. Според Трамп, постојаните членки ќе мора да уплатат по 1 милијарда долари за финансирање на неговата работа.

Иницијативата е формално поврзана со Обединети нации, иако од ОН соопштија дека нивната улога ќе биде строго ограничена. Меѓу земјите што веќе се дел од одборот се Аргентина, Бахреин, Мароко, Пакистан и Турција, додека Велика Британија, Франција и Италија засега одбиваат учество.