Низа случаи на насилство меѓу малолетници: Полицијата истражува инциденти во Скопје и Струмица
31/01/2026 16:15
Полицијата информира за повеќе пријавени случаи на насилство меѓу малолетници во Скопје и Струмица, за кои се преземаат мерки за целосно расчистување.
Од СВР Скопје соопштуваат дека на 30 јануари 2026 година во 15:45 часот, В.П. (47) од Скопје пријавил дека претходниот ден, околу 19:00 часот, на подрачјето на Центар, во близина на средно училиште, неговата малолетна ќерка била физички нападната од нејзина соученичка, по претходно недоразбирање.
Истиот ден, околу 21:00 часот, во СВР Скопје, А.С. (52) пријавила дека околу 18:00 часот, на автобуска постојка на подрачјето на Карпош, двајца малолетници со закана му одзеле пари на нејзиниот малолетен син.
Во двата случаи, од полицијата информираат дека се преземаат соодветни мерки за утврдување на сите околности и за документирање на настаните.
Дополнително, СВР Струмица до Основно јавно обвинителство Струмица достави известување согласно Законот за правда за децата против тројца малолетници од Струмица. Тие се сомничат дека сториле кривично дело „насилство врз дете“, откако на 29 декември 2025 година физички нападнале нивен соученик во основно училиште, а потоа и надвор од училиштето.
Надлежните институции најавуваат продолжување на постапките согласно законските прописи, со посебен фокус на заштитата на децата и превенција од врсничко насилство.
