Моќна концентрација на американска флота на Блискиот Исток
18/02/2026 13:23
Приближно една третина од активните поморски сили на Морнарица на САД во моментов се концентрирани на Блискиот Исток, во услови на растечки тензии со Иран. Одбранбени аналитичари оценуваат дека станува збор за ретко видена демонстрација на воена моќ во регионот.
Според достапните анализи, распоредот вклучува две ударни групи носачи на авиони, 15 разорувачи и засега непознат број подморници. Воедно, тешки транспортни авиони и танкери за дополнување гориво наводно го преминале Средоземјето и се позиционираат кон Блискиот Исток.
Меѓу активните сили е и ударната група околу носачот USS Abraham Lincoln, која од средината на февруари 2026 година оперира во Арапското Море, јужно од Иран. Нуклеарниот носач USS Gerald R. Ford го преминува Атлантикот, додека според медиумски извештаи е наредена подготвеност и за групата на USS George H.W. Bush.
Аналитичарите од Центар за стратешки и меѓународни студии (CSIS) го опишуваат распоредот како „мешовит сигнал“, одвраќање и уверување на сојузниците, но и подготовка за можни вонредни сценарија, од одбранбени операции до прецизни удари.
Според OSINT-аналитичари, една ваква групација би можела во еден бран да лансира стотици крстосувачки проектили „Томахавк“, без во пресметките да се вклучат новите системи за насочено енергетско оружје.
Американскиот претседател Доналд Трамп изјави дека Иран треба да избере меѓу „договор или удар“, повикувајќи на нов нуклеарен договор. Причините за засиленото присуство, според аналитичарите, се поврзуваат со иранскиот нуклеарен напредок, нападите врз сојузнички цели во Црвеното Море и заканите кон Израел.
Вашингтон ја истакнува и стратешката важност на Ормутскиот Теснец, низ кој минуваат околу 20 проценти од светската нафта, како клучна точка за глобалната енергетска безбедност.
Во евентуален конфликт, американските сили би се соочиле со ирански беспилотни летала, противбродски балистички ракети и електронско попречување. Системот „Aegis“ се смета за централна алка во слоевитата одбрана, комбинирајќи радарско следење и ракетни пресретнувачи, додека новите технологии овозможуваат автоматизирано препознавање и приоретизирање на заканите во реално време.
Засега останува неизвесно дали концентрацијата на сили ќе резултира со дипломатско решение или со дополнителна ескалација. Пораката од Вашингтон, според експертите, е дека САД демонстрираат подготвеност за дејствување во регион што влегува во период на зголемена неизвесност.
