Во последните 24 часа полицијата евидентирала 14 пријави за семејно насилство на повеќе локации низ државата, а четири лица се лишени од слобода во Скопје, Кавадарци и гостиварско.
Во Гостивар, 35-годишна жена од Кичево пријавила дека нејзиниот поранешен сопруг ѝ упатувал закани и се однесувал агресивно кон неа поради претходни недоразбирања.
Друг случај е пријавен и од 21-годишник од гостиварско, кој информирал дека неговиот татко во семејниот дом кршел предмети, барал пари и упатувал закани кон членовите на семејството.
Во гостиварско, 44-годишна жена пријавила дека била физички нападната од својот брат. Подоцна, полициски службеници го лишиле од слобода 21-годишниот А.Р., откако неговата 23-годишна невенчана сопруга пријавила дека ја нападнал и употребил остар предмет.
Во Кавадарци полицијата уапсила 65-годишен маж кој, според пријавата, физички ја нападнал својата 64-годишна сопруга.
Во Скопје се регистрирани повеќе случаи на семејно насилство, вклучително и физички напади меѓу сопружници и партнери, како и закани со остар предмет во семејниот дом.
Еден од случаите вклучува напад врз бремена жена, за што полицијата го привела 31-годишниот осомничен.
Исто така, во Аеродром бил приведен 68-годишен скопјанец кој се заканувал со остар предмет на својот 35-годишен син.
Од Министерството за внатрешни работи информираат дека се преземаат мерки за целосно расчистување и документирање на сите случаи, по што против осомничените ќе бидат поднесени соодветни пријави.
