Ракета ја погоди италијанската база во Ербил во Ирак
12/03/2026 10:34
Италијанската воена база во Ербил, во автономниот регион Курдистан во Ирак, била погодена со ракета во текот на ноќта, соопшти италијанското Министерство за одбрана.
Според првичните информации, во нападот нема загинати ниту повредени меѓу италијанските војници. Од министерството посочиле дека целиот воен персонал е безбеден.
По нападот, италијанските војници веднаш се засолниле во бункер, а сите членови на контингентот се на сигурно, објави и шефот на италијанската дипломатија Антонио Тајани во посебна порака на социјалната мрежа X.
Тајани остро го осуди нападот, нагласувајќи дека станува збор за сериозен инцидент во период кога тензиите на Блискиот Исток повторно растат.
Ербил се наоѓа во ирачкиот автономен регион Курдистан, каде се распоредени повеќе меѓународни воени бази со присуство на западни сили. Токму затоа, секој напад врз вакви објекти предизвикува дополнителна загриженост за безбедноста во регионот.
Овој напад доаѓа во чувствителен момент, кога состојбата на Блискиот Исток е дополнително вжештена поради конфликтот меѓу Иран, САД и Израел, што ја зголемува опасноста од нова ескалација.
