Израелско-американски напади врз два ирански енергетски објекти и покрај најавата на Трамп
24/03/2026 9:40
Два ирански енергетски објекти биле цел на израелско-американски напади, само неколку часа откако американскиот претседател Доналд Трамп неочекувано изјави дека иранските енергетски капацитети нема да бидат таргетирани.
Според информациите што ги пренесуваат светските медиуми, повикувајќи се на иранската агенција Фарс, во нападите биле погодени административна зграда и станица за преработка на гас во Исфахан.
Во објавените информации се наведува дека погодените објекти претрпеле делумни оштетувања. Засега нема официјални податоци за можни жртви или за пошироки последици врз енергетската инфраструктура.
Истовремено, според истите извори, бил извршен и напад насочен кон гасовод поврзан со електроцентрала во близина на Хорамшар, пристанишен град во југозападниот дел на Иран, во близина на границата со Ирак.
„Проектил падна близу инсталациите за преработка на гасоводот Хорамшар“, пренесува агенцијата, повикувајќи се на изјава од гувернерот на градот.
За овој втор инцидент засега не се објавени конкретни информации за евентуална штета.
Нападите дополнително ги зголемуваат тензиите на Блискиот Исток, особено по претходните сигнали дека енергетските капацитети би можеле да бидат изземени од директни удари. Развојот на настаните повторно ја отвора загриженоста за можни последици врз регионалната безбедност и глобалните енергетски пазари.
