Иран: Не поминувајте низ Орумскиот Теснец без координација
09/04/2026 10:25
Иран ги предупредува бродовите да не поминуваат низ Орумскиот Теснец без координација со Револуционерната гарда
Пристанишните власти се повикуваат на ризик од мини во виталниот воден пат. Договорот за двонеделно примирје меѓу Иран и САД е загрозен поради израелските напади врз Либан и заканите на Техеран за повлекување.
Страв од мини и опасност за бродовите
Иранските пристанишни власти им советуваа на бродовите да не поминуваат низ Орумскиот Теснец без претходна координација со Иранскиот корпус на исламската револуционерна гарда (IRGC), наведувајќи го ризикот од мини во виталниот воден пат по неколкунеделниот конфликт, јави ДПА, пренесувајќи го денеска предупредувањето објавено во државните медиуми.
Иранската агенција Фарс претходно објави дека Иран го прекинал бродскиот сообраќај низ теснецот во знак на протест против израелските напади во Либан, велејќи дека само два танкери за нафта поминале низ водниот пат од почетокот на прекинот на огнот.
Договор за двонеделно примирје
Иран и САД завчера се согласија на двонеделна пауза во борбите и привремено повторно отворање на Орумскиот Теснец за да се спречи масовен бран напади со кои се закани американскиот претседател Доналд Трамп.
Договорот беше пофален од политичарите ширум светот, но загриженоста останува за ситуацијата во Либан, со нападите што се во тек од страна на Израел, пренесе ДПА.
Пакистанско посредување и израелски став
Според пакистанскиот премиер Шехбаз Шариф, договорот, постигнат со посредство на Пакистан, важи и за Либан. Меѓутоа, израелскиот премиер Бенјамин Нетанјаху изјави дека прекинот на огнот се однесува само на конфликтот меѓу САД и Иран, не и за операцијата против Хезболах, кој е сојузник на Иран.
Иран се заканува со повлекување
Иран се закани дека ќе се повлече од договорот во знак на протест и ќе го запре бродскиот сообраќај во теснецот.
Водниот пат, клучен за глобалната трговија со нафта и гас, е во голема мера затворен откако САД и Израел започнаа големи напади врз Иран на 28 февруари.
