Страв во скопски автобус: Малолетници извадиле ножеви

Страв во скопски автобус: Малолетници извадија ножеви, мајка интервенираше

Празникот се претворил во кошмар

Празничен ден, пикник и детска радост, но за неколку минути сè се претворило во сцена на страв и насилство. Скопјанката Наташа Младеновска сведочи за инцидент во автобус од Водно кон центарот на Скопје, во кој учествувале малолетници, а ситуацијата ескалирала до вадење ножеви.

Според нејзиното сведоштво, сè започнало со недоразбирања меѓу деца на возраст од околу 16 години, кои брзо прераснале во провокации и закани. Клучниот момент бил кога дел од нив извадиле ножеви.

„Добив повик од ќерка ми. Паника, плачење, глас кој се тресе“

Младеновска раскажува дека веднаш добила повик од својата ќерка.

„Паника. Плачење. Глас кој се тресе.“

Таа веднаш тргнала со автомобил за да стигне до местото на настанот.

Се соочила со четворица бесни тинејџери со ножеви

Во обид да спречи поголем инцидент, таа ги пронашла младите и директно им се обратила.

„Четворица. Две девојчиња и нивните дечковци. Бесни, под дејство на алкохол, со ножеви во рака тргнаа кон мене.“

Со присебност, вели, успеала да ја смири ситуацијата, иако признава дека била подготвена на сè.

„Го оттурнав хаосот со зборови, а одвнатре – вулкани.“

Завршило без повредени, но проблемот останува

Инцидентот завршил без физички последици, но според неа, суштинскиот проблем останува.

„Не можам да се смирам од мислата што можеше да се случи. Денес децата носат ножеви како да е тоа нормално.“

Алкохол, агресија и страв кај граѓаните

Таа укажува на поширок проблем:

• присуство на алкохол кај малолетници

• насилство и агресија

• страв кај граѓаните да реагираат во вакви ситуации

„Ова не е само приказна од еден ден. Ова е реалност. Прашањето е – до кога?“

Реакции и препораки

Случајот повторно го отвори прашањето за безбедноста во јавниот превоз, но и за превенцијата на насилството меѓу малолетниците. Од психолозите порачуваат дека родителите треба да разговараат со своите деца за опасностите од носење оружје и за последиците од насилството, додека од надлежните институции очекуваат почести контроли и поголемо присуство во јавниот превоз за време на викендите и празниците.