МВР предупредува на нова измама: Лажни пораки за сообраќајни прекршоци и наплата преку фалсификувана страница
14/05/2026 9:03
Министерството за внатрешни работи предупредува на нов обид за интернет измама што деновиве е насочен кон македонски граѓани.
Од Секторот за компјутерски криминал при Бирото за јавна безбедност и Одделението за сајбер безбедност информираат дека непознати лица испраќаат пораки од странскиот телефонски број +639606963624.
Во пораките се тврди дека примачот има наводно регистриран сообраќаен прекршок. Потоа се бара плаќање со платежна картичка преку лажна веб-страница.
Според МВР, измамата се спроведува така што граѓаните се наведуваат да кликнат на линк оставен во пораката. Тој води до лажна интернет-страница што наликува на веб-сајт на Министерството.
На страницата прво се бара внесување на регистарската табличка на возилото. Потоа се отвора нов прозорец во кој се прикажува наводен прекршок и се бара уплата од 1.500 денари.
Од МВР апелираат граѓаните да бидат внимателни и да не наседнуваат на вакви пораки.
„Апелираме до граѓаните да бидат претпазливи и да не веруваат на пораки кои доаѓаат од нелегитимен веб-сајт на Министерството. Ниту да оставаат свои лични податоци и податоци од својата платежна картичка, кои потоа претставуваат цел на злоупотреба“, велат од МВР.
Оттаму предупредуваат и граѓаните и правните субјекти да не отвораат сомнителни линкови и прикачени документи што доаѓаат од непознати или неверификувани испраќачи.
Целта, како што посочуваат од Министерството, е да се спречи злоупотреба на лични и банкарски податоци и да не се наседнува на измами од ваков тип.
Министерството за внатрешни работи предупредува на нов обид за интернет измама што деновиве е насочен кон македонски граѓани.
