Левица: ВМРО-ДПМНЕ и ВЛЕН го туркаат истиот закон за казина што порано го нарекуваа „смешен“
16/05/2026 13:05
Левица обвинува дека Владата предводена од ВМРО-ДПМНЕ и ВЛЕН предлага ист закон за игри на среќа со истото ограничување од 500 метри, иако додека биле во опозиција го нарекувале недоволен и „смешен“.
Од партијата потсетуваат дека сегашниот вицепремиер Изет Меџити во 2023 година јавно изјавил дека растојанието од 500 метри од училиштата и верските објекти е премало. Тогаш, според Левица, биле најавувани амандмани со кои казината требало да бидат најмалку три километри од населените места.
Сега, велат од Левица, истите партии целосно се откажале од тие ветувања. Наместо построги правила, според нив, Владата нуди решение што не носи суштинска промена.
Левица оценува дека разликата е само во тоа што, наместо СДСМ и ДУИ, сега ВМРО-ДПМНЕ и ВЛЕН се новите политички покровители на бизнисот со игрите на среќа.
Партијата реагира и на тоа што, како што наведува, власта зборува за борба против коцкањето, а не ја укинува онлајн платформата „Мегавин“.
Според Левица, токму онлајн игрите на среќа се меѓу главните канали преку кои коцкањето се шири меѓу младите и семејствата.
„Наместо суштинска реформа, власта нуди шминкерски закон кој единствено му удоволува на коцкарскиот бизнис и создава лажен впечаток за наводна регулација“, велат од партијата.
Од Левица сметаат дека со вакви половични мерки нема да се намали зависноста од коцкање, ниту ќе се заштитат младите.
Поради тоа, најавуваат дека остануваат на својот предлог. Според нив, казината и обложувалниците треба да бидат дозволени исклучиво во погранични реони и туристички центри, надвор од урбаните средини.
Од партијата порачуваат дека сè друго е само политички маркетинг и заштита на профитите на коцкарската индустрија.
Левица обвинува дека Владата предводена од ВМРО-ДПМНЕ и ВЛЕН предлага ист закон за игри на среќа со истото ограничување од 500 метри, иако додека биле во опозиција го нарекувале недоволен и „смешен“.
