ИПАРД 3 пред бизнис-заедницата: Презентирани нови можности за инвестиции во земјоделството и преработката
21/05/2026 8:25
Директорката на Агенцијата за финансиска поддршка во земјоделството и руралниот развој, Даниела Иротова Лазарева, пред претставници на бизнис-секторот ги презентираше можностите за искористување на средствата од ИПАРД 3 програмата.
Настанот беше организиран од Стопанската комора. На него присуствуваа голем број домашни бизнисмени, како и осум компании од Италија.
Италијанските компании ги претставија најновите технологии, практики и опрема за преработка на месо. Овие решенија сега им се достапни и на домашните компании кои сакаат да инвестираат и да го модернизираат производството.
Според директорката Иротова Лазарева, домашните инвеститори полесно можат да дојдат до ваква современа опрема токму преку користење на средствата од ИПАРД 3 програмата.
Таа нагласи дека програмата отвора реална можност за модернизација на капацитетите, зголемување на конкурентноста и поттикнување нови инвестиции во земјоделството и прехранбената индустрија.
Пред присутните се обратија и амбасадорот на Италија во земјава, Паоло Палминтери, како и претседателот на Стопанската комора, Бранко Азески.
Настанот беше оценет како добра можност за поврзување на домашниот бизнис со современи европски практики и за поголема искористеност на средствата што им стојат на располагање на компаниите преку ИПАРД 3.
Директорката на Агенцијата за финансиска поддршка во земјоделството и руралниот развој, Даниела Иротова Лазарева, пред претставници на бизнис-секторот ги презентираше можностите за искористување на средствата од ИПАРД 3 програмата.
