УЈП почна проверки на приливите од странство: Граѓаните добиваат персонализирани известувања за доходот од 2021 година

УЈП проверува приливи од странство што граѓаните ги оствариле во текот на 2021 година, користејќи ги податоците добиени од банките.

Управата за јавни приходи соопшти дека веќе испратила персонализирани известувања до физички лица – резиденти на Македонија, за кои располага со информации дека во 2021 година оствариле доход од странство.

Од граѓаните се бара во определениот рок да проверат дали имаат даночна обврска и, доколку е потребно, да го пријават доходот и да го платат утврдениот данок.

Ако нема доброволно пријавување, УЈП ќе преземе мерки

Од УЈП потсетуваат дека во текот на годината повеќепати ги повикувале граѓаните да ги исполнат даночните обврски за изминатите години и давале насоки за начинот на пријавување.

Сега, покрај јавните повици, се испраќаат и персонализирани известувања со конкретен рок за постапување.

Доколку даночните обврски не бидат доброволно исполнети, УЈП најавува дека ќе ги преземе мерките што ѝ стојат на располагање согласно законските надлежности за утврдување на данокот.

Не секој прилив од странство се оданочува

Од Управата нагласуваат дека самото примање пари од странство не значи автоматски дека граѓанинот има обврска да плати данок.

Даночната обврска зависи од основот по кој се примени средствата и од тоа дали тие претставуваат доход кој се оданочува согласно Законот за данокот на личен доход.

Кој доход треба да се пријави?

Пријавување е потребно за доход од странство што подлежи на оданочување, меѓу кој спаѓаат:

– плата, хонорари, интелектуални услуги и фриленс работа;
– доход од закуп, вклучително преку Airbnb и Booking.com;
– капитални добивки од продажба на имот, криптовалути, хартии од вредност и друго;
– дивиденди, камати и други приходи од капитал;
– приходи од авторски права;
– добивки од игри на среќа;
– други видови доход што според закон подлежат на оданочување.

Подароци и семејна поддршка не се автоматски оданочиви

УЈП појаснува дека приливите добиени како подарок, семејна поддршка, позајмица или трансфери преку Western Union, Ria, MoneyGram и слични сервиси не се автоматски оданочив доход.

Во соопштението до медиумите се даваат и детални насоки за постапката на пријавување, начинот на пополнување на пресметката, плаќањето на данокот и примената на договорите за избегнување на двојно оданочување  кои се достапни на следните линкови:
– http://www.ujp.gov.mk/mk/javnost/soopstenija/pogledni/1170
– е -даночни услуги https://e-ujp.ujp.gov.mk/ureg/login.seam
– Список на држави со кои е склучен договор за избегнување двојно оданочување
– Упатство за пополнување на електронската пресметка
Даночните обврзници се упатуваат да ги разгледаат и мислењата издадени од Управата за јавни приходи поврзани со примената на одредбите од Законот за данокот на личен доход, кои може да се најдат на следните линкови:
– http://www.ujp.gov.mk/mk/prasanja/category/2127 ;
– http://www.ujp.gov.mk/mk/prasanja/category/2089

Клучно е да се утврди вистинскиот основ на приливот. Кога тоа е потребно, граѓанинот треба да располага и со соодветни документи со кои може да докаже од каде потекнуваат средствата.

Граѓаните да ја проверат својата обврска

Управата ги повикува сите лица кои примале средства од странство да проверат дали имаат даночна обврска.

Доколку станува збор за оданочив доход, потребно е да се поднесе електронска пресметка на аконтацијата на данокот – е-ППД и да се изврши уплата на утврдениот данок.

УЈП објави и детални насоки за пријавувањето, плаќањето на данокот и примената на договорите за избегнување двојно оданочување.

УЈП проверува приливи од странство за 2021 година, но од Управата потенцираат дека граѓаните кои добиле известување прво треба да утврдат дали конкретниот прилив навистина претставува оданочив доход.