Километарски колони: По неколку часа се чека влез во Грција

14/06/2026 10:16

За влез во Грција се чека по неколку часа

Почетокот на летната сезона донесе големи гужви на граничните премини кон Грција, каде што утрово се бележат повеќечасовни задржувања. Најголемиот дел од патниците се туристи кои заминуваат на одмор во грчките летувалишта .

Гужви на Богородица и Дојран

Според информации од патници, на граничниот премин Богородица за излез од Македонија, како и на преминот Евзони за влез во Грција, се чека и по неколку часа . Долги колони се формирале и на граничниот премин Дојран, каде што исто така се бележат значителни задржувања .

Патниците на социјалните мрежи споделуваат дека чекаат веќе три часа, а крајот на колоната сè уште не се гледа . Километарските колони се протегаат, а десетици туристички автобуси се исто така во редиците .

Меџитлија – подобра алтернатива

За разлика од овие два премини, на граничниот премин Меџитлија чекањето е пократко, па дел од патниците се одлучуваат токму за оваа рута за влез во Грција.

Причина за гужвите

Доцнењата се делумно поврзани со имплементацијата на новиот Систем за влез/излез на Европската Унија (EES) , кој предвидува електронска и биометриска регистрација на државјани на трети земји . Туристичките комори од регионот предупредуваа дека системот може да предизвика сериозни застои на границите во летната сезона .

Засилената фреквенција на возила се очекува да продолжи и во текот на денот .