Драмски театар слави 80 години со бесплатна претстава
15/06/2026 13:15
80 години Драмски театар: Бесплатна претстава на амфитеатарот кај спомен-куќата на Мајка Тереза
Драмски театар Скопје првиот дел од сезоната во која ја прославува 80-годишнината од постоењето, ја заокружува со изведба на претставата „Чудесна терапија“ утре (вторник) во 21 часот на отворено во центарот на градот.
Каде и кога?
Граѓаните и посетителите на главниот град претставата ќе може да ја гледаат бесплатно на локацијата на малиот амфитеатар во комплексот на спомен-куќата на Мајка Тереза на улица „Македонија“ во Скопје.
За претставата
„Чудесна терапија“ е работена по текст на авторот Даниел Глатауер.
Режисер: Димче Николовски
Драматург: Александра Бошковска
Костимограф: Раде Василев
Улоги
Улогите ги играат актерите на Драмски театар:
Предраг Павловски
Маја Вељковиќ-Пановска
Соња Стамболџиоска
Што вели драматургот?
Драматургот Александра Бошковска во програмската белешка за претставата вели:
„Претставата ‘Чудесна терапија’ се занимава со потребата од чиста и искрена комуникација како предуслов за една среќна врска. При тоа, безусловно сме свесни дека во комуникациската еволуција, човештвото има уште многу етапи што треба да ги совлада. Комуникацијата е универзална способност на секој човек. Но, дали знаеме вистински да комуницираме? Се чини едноставно, но во врска, сакале или не, сѐ станува комплицирано. Понекогаш и до бескрај. Разговорот знае да прерасне во кавга, кавгата во конфликт, а конфликтот во војна. А проблемот, наместо да биде решен, да роди нов, поголем проблем.“
Досегашни изведби
Претставата премиерно е изведена во мај 2019 година и до сега има 55 изведби, од кои десетина гостувања биле на театарските фестивали во Македонија и во земјите од регионот.
Поради универзалноста на темата и бравурозната изведба на актерската екипа, комедијата има одличен прием и актерите добиваат силни аплаузи како израз на задоволство на театарската публика.
