Високите температури ги зголемија повиците за Итна помош, над пет лица колабирале на јавни места

Високите температури ги зголемија повиците за медицинска помош во Скопје. Над пет колабирања на јавни места, главно кај постари лица, биле евидентирани вчера изутрината, информираа од Итната медицинска помош – Скопје.

Докторката Ана Џарева посочи дека граѓаните најчесто се жалат на болки во градите, но има и лица кои чувствуваат вртоглавица и други симптоми.

„Лицата претежно се жалат на болки во градите, но има и такви кои чувствуваат вртоглавици и имаат други симптоми“, истакна Џарева.

Препораки за заштита од топлото време

Од Итната помош повторно апелираат граѓаните да избегнуваат излегување на отворено во периодот од 11 до 17 часот.

Доколку е можно, обврските треба да се одложат за подоцна или да се завршат во раните утрински часови.

Во спротивно, се препорачува носење лесна облека, шапка и заштита од директна изложеност на сонце.

Повеќе течности и лесна храна

Лекарите препорачуваат во текот на топлите денови да се консумира лесна храна, како овошје, зеленчук и свежи салати.

Граѓаните треба да внесуваат повеќе течности, пред сè вода и природни сокови.

Воедно, се препорачува избегнување пијалаци што содржат алкохол и кофеин, како и тешка и мрсна храна.

Министерството за здравство вчера ги сподели и препораките на Институтот за јавно здравје за заштита од високите температури.

Share on Facebook

Tweet

Follow us

Save