МВР распиша оглас за 200 ученици во Средното полициско училиште „7-ми Мај“
Пријавувањето трае 15 дена, селекцијата се одвива во три фази, а по завршувањето следи вработување без дополнителен оглас
Услови за пријавување
Министерството за внатрешни работи распиша јавен повик за прием на 200 редовни ученици во Средното полициско училиште „7-ми Мај“ , кое функционира во рамки на Полициската академија. Право на пријавување имаат ученици кои ја завршиле втората година од средното образование и ги исполнуваат законски утврдените услови.
Кандидатите треба да бидат:
државјани на Република Македонија;
да немаат наполнето 18 годинина денот на објавувањето на јавниот повик;
активно да го користат македонскиот јазик;
здравствено и психофизички способни.
Покрај општите услови, потребно е кандидатите да имаат најмалку добар успех во прва и втора година средно образование, да немаат изречени педагошки мерки, да ги исполнат критериумите за моторички способности, успешно да положат општообразовен тест и да поминат интервју.
Пријавување и селекција
Пријавувањето ќе трае 15 дена, а документите се поднесуваат во секторите за внатрешни работи и полициските станици определени во јавниот повик, секој работен ден од 8 до 16 часот.
Селекцијата ќе се одвива во три фази:
Проверка на физичката подготвеност, тестирање на моторичките способности на кандидатите;
Писмен тест, 40 прашања од општообразовен карактер;
Интервју, проценка на психофизичката подобност и комуникациските вештини.
Кандидатите ќе бидат рангирани според вкупниот број освоени бодови, по што Комисијата ќе ја објави конечната ранг-листа на примени ученици.
Услови за учениците и вработување по завршувањето
За учениците кои ќе бидат примени, Министерството за внатрешни работи обезбедува сместување во ученички дом во рамки на Полициската академија, исхрана и работна облека.
По успешно завршување на четиригодишното образование, учениците ќе полагаат завршен испит согласно Законот за средното образование, а МВР ќе им заснова работен однос без јавен оглас на работно место Полицаец, во согласност со законските прописи.
