Нафтата поевтинува по смирувањето на тензиите на блискиот исток

27/07/2026 9:11

Цените на нафтата паѓаат по затишјето меѓу САД и Иран, пазарите и понатаму внимателни

Брент и WTI со значителен пад на почетокот на неделата

Цените на нафтата забележаа пад на почетокот на неделното тргување, продолжувајќи го повлекувањето од двомесечниот максимум достигнат минатата седмица. Намалувањето следува откако втор ден по ред немаше нови воени напади меѓу САД и Иран во регионот на Персискиот Залив.

Фјучерсите на суровата нафта Брент за септемвриска испорака се намалија за 4,9 проценти и достигнаа цена од 92,02 долари за барел, по падот од 3,9 проценти во петокот. Минатата недела Брент накратко ја надмина границата од 102 долари за барел, што беше највисоко ниво од мај.

Стравувањата од конфликт го туркаа растот на цените

Во изминатите недели цените на нафтата бележеа силен раст поради стравувањата дека евентуална ескалација на конфликтот на Блискиот Исток би можела да го наруши глобалното снабдување со сурова нафта.

Посебно внимание на пазарите предизвикува состојбата во Ормускиот Теснец, преку кој поминува околу една петтина од светскиот извоз на нафта. Поради безбедносните ризици, бродскиот сообраќај низ овој стратешки поморски премин е значително намален.

Аналитичарите очекуваат нестабилност

Во меѓувреме, американската референтна сурова нафта WTI за септемвриска испорака поевтини за 5,6 проценти и се тргуваше по цена од 84,34 долари за барел.

И покрај најновото намалување на цените, аналитичарите оценуваат дека неизвесноста на нафтените пазари останува висока. Според нив, понатамошното движење на цените ќе зависи од развојот на безбедносната состојба на Блискиот Исток и од глобалните економски движења.