Македонија одбележува 35 години независност: Како граѓаните во 1991 година избраа самостојна држава

Македонија одбележува 35 години независност, државен празник што се слави на 8 Септември.

Овој ден ја симболизира сувереноста, независноста и самостојноста на Македонија, како и долгата историска борба за сопствена држава.

Референдумот од 8 септември 1991 година

Клучниот момент во процесот на осамостојување беше референдумот одржан на 8 септември 1991 година.

На него граѓаните одговараа на прашањето:

„Дали сте за самостојна Македонија со право да стапи во иден сојуз на суверени држави на Југославија?“

Според официјалните податоци, во избирачкиот список биле запишани 1.495.626 гласачи.

На референдумот излегле 1.132.981 граѓани.

Од нив, 1.079.308 гласале „ЗА“, што претставувало 95,09 отсто од оние што гласале.

Одлуката дојде во период на распад на Југославија

Референдумот се одржа во период кога СФРЈ веќе влегуваше во длабока политичка и безбедносна криза.

Словенија и Хрватска веќе се движеа кон независност, а вооружените конфликти во поранешната федерација стануваа сè поинтензивни.

Во Македонија, пак, првиот повеќепартиски парламент уште на 25 јануари 1991 година ја усвои Декларацијата за сувереност.

Потоа, на 26 јули, беше донесена и одлуката за распишување референдум.

Масовна поддршка за независност

Пред референдумот се водеше широка јавна кампања.

На 2 септември беше објавен заеднички проглас на парламентарни и вонпарламентарни партии.

Со него граѓаните беа повикани масовно да излезат и да гласаат „ЗА“.

Текот на референдумот го следеле 167 домашни и 100 странски акредитирани новинари.

Без приговори за спроведувањето

Во официјалниот извештај на Комисијата за спроведување на референдумот било наведено дека немало приговори или жалби за неправилности.

Комисијата ја констатирала масовната поддршка на граѓаните за самостојна и суверена Македонија.

Од референдум до независна држава

По референдумот следуваа и други клучни чекори во државотворниот процес.

На 17 септември 1991 година беше усвоена Декларацијата по повод плебисцитарно изразената волја на граѓаните.

На 17 ноември истата година беше донесен и Уставот.

Македонија одбележува 35 години независност, потсетувајќи се на 8 септември 1991 година, кога огромното мнозинство од граѓаните се изјасни за самостојна држава.